Duaaein :-

mere khwabon ko armaanon ko thodi shiddat de maula ,[shiddat : conviction , determination]
khud se khud ko jeet sakoon itni himmat de maula ...

apne gham se apne dard se jaane kyun ghutta main jaa raha ,
jakham paraye baant sakoon itni chaahat de maula ...

jaane kis andhi daud mein insaan bhaagta jaa raha ,
mrigtrishna banti pyaas ko thodi raahat de maula .........

aansoo shikwe bas dard aur aahein jeevan ka ye kya roop hua ,
dojakh hoti zindagaani ko thodi jannat de maula ......(dojakh – hell)

jiski kokh se janam liya use hi insaan aaj ujaad raha ,
lutti seeta draupadiyon ki aabroo ko fir asmat de maula .....(an appeal to stop killing girl child)(asmat- respect , izzat)

insaan sayana ho raha par buniyadon se apni choot raha ,
soch samajh waalon ko thodi bholi fitrat de maula ...

hansi khokhli ho rahi aankhon ka dariya sookh raha ,
patthar hote jazbaaton ko thodi rahmat de maula ...

badle waqt mein kaise humne tujhse faasle kar liye ,
khudgarz hote insaanon ko apni wahshat de maula ...

[Note: Mrigtrishna : means in summer ek hiran ko jab pyaas lagti hai tab wo door sadak par garmi ki wajah se dhundhle nazaron ko paani samajh kar bhagta rehta hai but it’s not actually water … that’s called mrig”Deer” trishna”thirst” thirst of a deer ]