fitoor

yun bhi dimaag ko kaise kaise fitoor hote hain ...
main canvas par zindagi ki ek tasveer banata hun ,
anginat ehsaason ke rang hain jisme ,
kuch pighalte lamhon ki parchaiyaan bhi hain ...
dhoop mein jhulse hue jazbaat hain jisme ,
kahin shor se ladti tanhaaiyaan bhi hain ...
toofano se ladta hua maaji hai mera ,
kahin dhalti shaamon ki thakaan bhi hai ,
jhoomti hui baharein bhi hain kahin ,
kahin dum ghutaane waali tahaan bhi hai ...
makhmali muhabbat ke dhaage hain yahaan ,
lahoo jalaata nafraton ka rang bhi hai ...
ye sab rang mere apne hain ,
haqiqat hain ye na koi sapne hain ...
ye tasveer ab mukammal hone ko hai ,
iske aks mujhme hi chipe hue hain kahin ...
ab tak main sochta tha
is painting ko main taaseer de raha hun ,
magar ye zindagi khud hai jo mere haathon
khud ko takhleeq diye jaati hai ...
yun bhi dimaag ko kaise kaise fitoor aur mugaalte hote hain ..
hain na ...