Haadsaa…

Haadsaa… poetry dedicated for all the disabled and handicapped people of the world who are indirectly teaching this
World how to live life kingsize not just in slogans but also
Practically ……




ek shab saath mere kuch haadsaa hua ,
na socha tha maine kabhi waisaa hua ,

kaafi dard utha chubhte hue seene se ,
ek dafaa jee bhar aayaa yun jeene se,

chalta raha mein yun hi sadak par tanha ,
dhuan udaata kuch gham mein ghumshuda ,

kuch malaal kuch shikwe uthe khuda ke liye ,
angaare se beh rahe the us fizaa ke liye ,

ye bhi laga ek dafaa ek baar ke liye ,
main hi kyun chuna gaya is daastaan ke liye ,

tabhi andhere mein ek kirdaar nazar aaya ,
wajood se ladta hua giraftaar nazar aaya ,

uske har lamhe mein jaise jung thi zindagi se ,
jung ko jeet raha tha magar halki si hansi se ,

tha wo bhi kisi haadse ka shikaar hua kabhi ,
lagta nahi tha magar fir bhi haara hua kahin ,

badan ko mere jaise kuch sannaton ne gher liya ,
pal ko laga jaise sanson ne zindagi se munh fer liya ,

khud ko uski tasveer mein ek pal rakhkar dekha ,
us mukaam se apni zindagi ko palatkar dekha ,

wo ek pal beette hue laga jaise sadiyaan gujar gayee ,
mere saare ghamon kee tasveerein aankhon se utar gayee ,

rooh talak bheeg gayee jaise kisi paseene se ,
kitni khushnuma thi meri zindagi aise jeene se ,

khauff bhare dil ne ek lambi si aah bhari ,
pehli baar kisi pal usne naa koi chaah kari ,

ek shukrana saa adaa hua us khuda ke liye ,
jiske shikwe liye firta tha main hamesha ke liye ,

har us nemat ke liye jo mujhko adaa hui thi ,
har us khushi ke liye jo mujhpar fidaa hui thi ,

laga ke jaise kabhi dard ne mujhe chuaa bhi nahi ,
jakham kya hote hain main kabhi jaantaa hi nahi ,

main badh gaya usi sadak par yun hi tanha tanha ,
is baar magar dil tha kuch nayee ummedon se bhara ,

jo jindagi kuch der pehle veeraan lag rahi thi ,
wahi ab jaise kisi maasoom ki muskaan lag rahi thi ,

palkon ki kore par kuch shabnam chalak rahi thi ,
kuch kuch ruk kar jaise raat behek rahi thi ,

us waakye se ab bhi hoti aankhein purnam hain ,
shayad kisi ne bilkul sacha hi kahaa hai
duniya mein kitna gham hai ,
mera gham kitna kam hai ...........
mera gham kitna kam hai ...........
mera gham kitna kam hai ...........

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!